Վեբ (HTML, CSS, JS) ծրագրավորում (պետական համաֆինանսավորմամբ)

ՀՀ բարձր տեխնոլոգիական արդյունաբերության նախարարության կողմից հայտարարված դրամաշնորհային ծրագրի շրջանակում Ինովացիոն Կենտրոն Հիմնադրամը համաֆինանսավորմամբ իրականացնում է սկսնակ և միջին մակարդակների «Web (HTML/CSS)» ծրագրավորման դասընթացներ։

---

Դասընթացի նպատակը

Ինովացիոն Կենտրոն Հիմնադրամը համաֆինանսավորմամբ իրականացնում է 250 մասնակցի համար նախատեսված սկսնակ (150 մասնակից) և միջին (100 մասնակից) մակարդակների «Web (HTML/CSS)» ծրագրավորման դասընթացներ, որը հնարավորություն կտա

Սկսնակ մակարդակի ուսանողներին՝

• Ձեռք բերել հիմնարար գիտելիքներ և բավարար հիմք վեբ ծրագրավորման գիտելիքները խորացնելու համար;
• Սովորել HTML5-ի և CSS3-ի հիմունքները;
• Ծանոթանալ JavaScript-ի հիմունքներին;
• Մշակել կայքերի էջեր որոշակի ֆունկցիոնալությամբ։

Միջին մակարդակի ուսանողներին՝

• Իրականացնել կամայական բարդության ստատիկ վեբ կայքի նախագծում (верстка);
• Սովորել օբյեկտ կողմնորոշված ծրագրավորման հասկացությունները JavaScript լեզվով;
• Ստեղծել ամբողջովին ֆունկցիոնալ վեբ կայքեր և desktop հավելվածներ։

---

Ո՞վ է իրականացնելու դասընթացը

Ինովացիոն Կենտրոն Հիմնադրամն (Մայքրոսոֆթ ինովացիոն կենտրոն Հայաստան) առաջարկում է տեխնոլոգիական ոլորտի կրթական ծրագրեր, որոնց միջոցով մասնակիցը կարող է սովորել ծրագրավորում և ձեռք բերել ծրագրավորման գործնական հմտություններ, խորացնել տարբեր ծրագրավորման լեզուների և տեխնոլոգիաների գիտելիքները։ Կենտրոնը օգնում է սովորողներին ձեռք բերել նաև փափուկ հմտություններ, իսկ լավ առաջադիմություն ցուցաբերածներին ուղղորդել տարբեր ՏՏ կազմակերպություններ՝ հարցազրույցների մասնակցելու համար։

Կենտրոնը առաջարկում է նորարար և արդյունավետ մոտեցում, թե ինչպես զարգացնել տեխնիկական և փափուկ /soft/ հմտություններ տեխնոլոգիական ոլորտում և մուտք գործել ՏՏ աշխատաշուկա՝ կամրջելով կրթությունը ՏՏ ընկերությունների հետ։

---

Ո՞վ կարող է մասնակցել

Ծրագրին կարող են մասնակցել ՀՀ-ում և Արցախի Հանրապետությունում բնակվող ՀՀ քաղաքացիները (Երևանից` 18, իսկ ՀՀ մարզերից և Արցախի Հանրապետությունից` 16 տարին լրացած անձինք) ովքեր կանցնեն դասընթացի ընդունելության կարգը և կհամապատասխանեն ծրագրի նպատակին:

Ծրագրի թիրախային խմբերն են՝

• Ուսանողները
• Կորոնավիրուսի (Covid-19) հետևանքով խոցելի խմբերի (տուրիզմ, սպասարկման և ծառայությունների մատուցման ոլորտ և այլն) մասնակիցները
• ԲՏ ոլորտի սկսնակները
• ԲՏ ոլորտում աշխատող մասնագետները
• Ցանկացած անձ, ով ցանկանում է ստանալ ԲՏ ոլորտում բազային և նեղ մասնագիտացված տեխնիկական կրթություն:

---

Մասնակցության պայմաններ

Դասընթացին մասնակցելու համար դիմորդը պետք է ունենա անհրաժեշտ նվազագույն գիտելիքներ և հմտություններ՝

Սկսնակ մակարդակի դեպքում՝

• մաթեմատիկայի դպրոցական ծրագրի բավարար իմացություն և տրամաբանական մտածողություն
• համակարգչային գրագիտություն

Միջին մակարդակի դեպքում՝

• Վեբ ծրագրավորման լեզվի հիմունքների գործնական իմացություն

Դասընթացի մասնակցության համար անհրաժեշտ տեխնիկական պայմաններ՝

• համակարգիչ
• արագ ինտերներ կապ
• միկրոֆոն
• տեսախցիկ (վերջինս ցանկալի է ունենալ, սակայն ոչ պարտադիր)

Մինչ դասընթացի մեկնարկը առցանց թեստի միջոցով կիրականացվի դիմորդների գիտելիքների գնահատում

Սկսնակ մակարդակ

Ընդունելության առցանց թեստը բաղկացած կլինի 10 հարցից։ Նախապատվությունը տրվելու է 60%-ից բարձր հավաքած մասնակիցներին։ Թեստը ստուգում է դիմորդի գիտելիքները մաթեմատիկայի դպրոցական ծրագրից

Միջին մակարդակ

Ընդունելության առցանց թեստը բաղկացած կլինի 10 հարցից։ Նախապատվությունը տրվելու է 60%-ից բարձր հավաքած մասնակիցներին։ Թեստը ստուգում է դիմորդի ունեցած գիտելիքները վեբ ծրագրավորման լեզվի հիմունքներից։

---

Դասընթացի վճար

Դասընթացները իրականացվում են համաֆինանսավորմամբ: Պետությունը կֆինանսավորի դասընթացի արժեքի մի մասը, որը կախված կլինի ընդունելության քննության արդյունքներից ։

Քննության արդյունքների հիման վրա կսահմանվի դասընթացի վճարի այն մասը, որը պետք է կատարի դասընթացի մասնակիցը։ Դասընթացին մասնակցելու համար դիմորդը պետք է դասընթացի մեկնարկից առաջ կատարի վճարումը։

Դասընթացի արժեք

• Սկսնակ – 46,800 ՀՀ դրամ
• Միջին – 98,400 ՀՀ դրամ

Օրինակ՝ «Web (HTML/CSS) ծրագրավորման» սկսնակ մակարդակի դասընթացի մասնակցության քննությունից ունեք 76%-ից բարձր արդյունք և

• եթե Դուք Երևանից եք, Ձեր դասընթացի 80%-ը (37,440 ՀՀ դրամ) կվճարի ԲՏԱ նախարարությունը, իսկ 20%-ը (9,360 ՀՀ դրամ) կվճարեք Դուք։
• եթե Դուք մարզից եք, Ձեր դասընթացի 90%-ը (42,120 ՀՀ դրամ) կվճարի ԲՏԱ նախարարությունը, իսկ 10%-ը (4,680 ՀՀ դրամ) կվճարի մասնակիցը։

---

Ի՞նչ ձևաչափով են լինելու դասընթացները

«Web (HTML/CSS)» ծրագրավորման սկսնակ մակարդակի դասընթացը իրականացվելու է շաբաթական 3 անգամ (ընդհանուր 12 դաս՝ յուրաքանչյուրը 2 ժամ տևողությամբ): Խումբը կազմված է լինելու մինչև 15 ուսանողից։

Սկսնակ մակարդակի դասընթացը բաղկացած է 24 ժամից՝ տեսական և գործնական մասերից

• Տեսական մասում նախատեսվում է 11.5 ժամ։
• Գործնական մասում նախատեսվում է 12.5 ժամ։

«Web (HTML/CSS)» ծրագրավորման միջին մակարդակի դասընթացը իրականացվելու է շաբաթական 3 անգամ (ընդհանուր 24 դաս՝ յուրաքանչյուրը 2 ժամ տևողությամբ): Խումբը կազմված է լինելու մինչև 15 ուսանողից։

Սկսնակ մակարդակի դասընթացը բաղկացած է 48 ժամից՝ տեսական և գործնական մասերից

• Տեսական մասում նախատեսվում է 22 ժամ։
• Գործնական մասում նախատեսվում է 26 ժամ։

Սկսնակ մակարդակի դասընթացի ավարտին մասնակիցը կկարողանա մշակել կայքերի էջեր որոշակի ֆունկցիոնալությամբ։ Իսկ միջին մակարդակի դասընթացի ավարտին մասնակիցը կկարողանա ստեղծել ամբողջովին ֆունկցիոնալ վեբ կայքեր և desktop հավելվածներ։

Դասընթացները իրականացվելու են առցանց (online) եղանակով՝ լիցենզավորված «Zoom» ծրագրային ապահովման միջոցով: Դասախոսի և դասընթացի մյուս մասնակիցների հետ ամենօրյա հաղորդակցության համար կօգտագործվի slack հարթակը։ Տնային առաջադրանքների համար կօգտագործվի github հարթակը:

Հայտնում ենք, որ դիմորդը կհեռացվի հետևյալ պայմանների դեպքում․

• 3 անընդմեջ բացակայության դեպքում Դուք կհեռացվեք դասընթացից, և Ձեր վճարած գումարը հետ չի վերադարձվելու։

• Դասընթացի 50% և ավել բացակայությունների դեպքում Դուք չեք ստանա ոչ մի վկայական և զրկված կլինեք հաջորդ փուլին մասնակցելու հնարավորությունից։

---

Ուսումնական ծրագիր